Është shtyrë protesta e Partisë Socialdemokrate, e paraparë të mbahej sot me kërkesë shkarkimin e ministrit të Financave, Hekuran Muratit.
Kryetari i Partisë Socialdemokrate, Dardan Molliqaj ka thënë se protesta është shtyrë ‘për një moment të dytë’.
Paralajmërimi për protestë erdhi pas disa deklaratave për Ushtrinë Çlirimtare të Kosovës, për të cilat më pas Murati kishte kërkuar edhe falje.
“Që ministri Murati ka ndërruar, zor t’i zihet besë. Ajo logjikë nxjerr krye tek vonesa në reagim. E përllogaritur sikur tek statusi për koston financiare të lirisë. Pendesa duket ndryshe dhe pasohet nga veprime konkrete. Test provues më i afërt në kohë do të jetë ligji për pagën minimale… Është presioni i qytetarëve që e detyroi Muratin të përkulet para luftës së UÇK-së. Ai u tërheq. Kjo fitore është e qytetarëve, por është e pamjaftueshme meqë është formale, sa për opinion publik. Është farsë”, ka shkruar ai.
Sipas tij, Partia Socialdemokrate do të vazhdojë me aktivitete në shërbim të dekonstruktimit të kësaj Qeverie anti-UÇK dhe do t’i kundërshtojë pa kompromis të gjitha elementet e saj, raporton kp.
“Mirëpo, për një fitore edhe më të madhe se kjo, ku e vërteta për çlirimin do të ishte e pacenushme, një herë e mirë, duhet një organizim edhe më i fuqishëm. Potenciali është i madh. Organizimi është zgjidhja. Në këtë rrethanë, ne duhet që protestën ta shtyjmë për një moment të dytë. Ditëve në vijim do të njoftoheni për aktivitetet e radhës”, ka përfunduar ai.
