Partia Demokratike thotë ka depozituar në Kuvend të enjten një projektligj për shndërrimin në muze kombëtarë të Burgut të Spaçit dhe Kampit të Tepelenës, dy nga institucionet me famëkeqe të periudhës koministe.
Në një postim në Facebook, kryetari i Grupit Parlamentar të PD-së, Enkelejd Alibeaj u shpreh sot se memoria historike për një vend që për gati 50 vite u rrënua nga diktatura komuniste shtron si domosdoshmëri që e shkuara e hidhur jo vetëm të njihet nga brezat e rinj, por dhe të shndërrohet në kujtesë ndërgjegjësuese për të sotmen dhe të ardhmen e Shqipërisë.
“Partia Demokratike ka në gjenezën e saj atë pjesë të shoqërisë që gjatë viteve të komunizmit u vra, u syrgjynos, u burgos dhe u persekutua në burgjet e kampet më të egra të Europës. Këto 30 vite kanë qenë tregues i qartë se veç asaj që është bërë për të këtë shtresë ka ende shumë kontribute për të dhënë që nga e djeshmja e errët të nxirren mësime për të sotmen dhe të ardhmen”, ka shtuar Alibeaj.
Sipas deputetit të PD-së, projektligji i shërben memories historike të Shqipërisë dhe si një respekt ndaj mijëra qytetarëve dhe pasardhësve të tyre që vuajtën terrorin e regjimit komunist.
