Ministri i Brendshëm serb, dhe ekstremisti prorus Aleksandar Vulin ka deklaruar për gazetën serbe “Politika” se e “vetmja mënyrë që Ballkani të mbetet stabil është që serbët të jetojnë në një shtet”.
“E vetmja mënyrë që Ballkani të mbetet stabil është që serbët të jetojnë në një shtet. Të gjitha konfliktet në Ballkan fillojnë “me diskriminimin” e serbëve. Aty ku respektohen të drejtat e serbëve, nuk kanë asnjë problem me ‘botën serbe’”, ka thënë ai, transmeton Paparaci.
Ishte i menjëhershëm reagimi i ambasadës amerikane në Serbi, e cila ka kumtuar se deklarata e ministrit të brendshëm serb Aleksandar Vulin për bashkimin e të gjithë serbëve në një shtet nuk është në përputhje me Marrëveshjen e Dejtonit dhe as me aspiratat evropiane të Serbisë.
“Marrëveshja e Paqes e Dejtonit ruan paqen dhe stabilitetin. Atë deri më tani e kanë përkrahur të gjitha qeveritë dhe të gjithë presidentët e Serbisë. Komentet e ministrit të punëve të brendshme të Serbisë për bashkimin e të gjithë serbëve në një shtet nuk janë në përputhje me Marrëveshjen e Dejtonit dhe bien ndesh me integrimin e Serbisë në strukturat evropiane”, shkruan ambasada në Twitter.
