Gazetari Valon Syla, ka ende nuk është kontaktuar nga Prokuroria mbi procesin rreth rastit të tij ku u sulmua nga tre persona të dyshuar javën e kaluar.
Syla përmes një reagimi në “Facebook” ka thënë se është i habitur me një gjë të tillë.
“Nuk i di saktësisht këto procedurat penale por diçka po me habit shumë në rastin e sulmit tim. Prokuroria/prokurori, as ai kujdestar e as ai që është caktu më vone, nuk më kanë kontaktu ende zyrtarisht. Prokuroria nuk me ka dhënë asnjë dokument rreth rastit tim, bile ende zyrtarisht nuk më kanë tregu kush është prokuror i rastit”, ka shkruar ai.
Ai madje ka thënë se nuk është njoftuar as nëse është mbajtur seancë për caktimin e paraburgimit të personave që e kanë sulmuar.
“Prokuroria/gjykata, trupi gjykues i procedurës paraprake, nuk me kane njoftu qe është mbajte seance për caktimin e paraburgimit të personave të dyshuar. Nga mediat jam informuar dhe kisha pas qejf me qene prezent unë ose avokati im. Ende nuk jam njoftu zyrtarisht për caktimin e paraburgimit, pra nuk e kam aktvendimin”, ka shtuar ai.
Syla ka thënë se ngjashëm kishte ndodhur me të edhe në rastin e kaluar.
“Unë besoj në drejtësi, por nuk po me doket në rregull kështu. Njëjtë ma kanë bo edhe ne rastin e parë, kur sulmuesi u dënua vetëm 4000 euro dhe pak ditë paraburgim”, ka thënë ai në fund.
