Kampioni i Turqisë, Trabzonspori ka shprehur interesim për portierin e Përfaqësueses së Kosovës, Arijanet Muriq. Lajmi është bërë i ditur të premten nga e përditshmja turke “Sabah”.
Drejtuesit e Trabzonsporit po bëjnë gati ofertën për Muriqin, i cili tashmë është nxjerrë në shitje nga Manchester City. Për transferimin e tij, Trabzoni është i gatshëm të ofrojë rreth 2.5 milionë euro.
Tek ekipi turk janë të bindur se 23-vjeçari është përforcim i duhur për portën pas paraqitjeve të mira sezonin e shkuar.
Muriq edicionin që lamë pas ishte i huazuar te Adana Demirspor dhe ishte ndër portierët më të vlerësuar në kampionatin turk.
Ai ka kontratë me Cityn deri në vitin 2024, por nuk bën pjesë në planet e klubit anglez dhe pritet të largohet këtë verë.
Krahas Trabzonsporit, interesim për portierin Muriq ka kohë që ka shfaqur edhe Burnley, ekip që garon në Championship të Anglisë.
