Qeveria e Kosovës në mbledhjen e 87-të të mbajtur sot ka marrë vendim që ministrja e Ekonomisë, Artane Rizvanolli, të marrë autorizim nga presidentja e vendit, Vjosa Osmani, në lidhje me projektin e MCC-së.
Në njoftimin e qeverisë bëhet e ditur se ajo (qeveria) ka përfunduar me sukses negocimin e Marrëveshjes së Bashkëfinancimit dhe Marrëveshjes për Implementimin e projektit “Kompakti i Sfidave të Mijëvjeçarit”.
“Objektivi kryesor i këtij projekti është sigurimi i stabilitetit të furnizimit me energji elektrike në Kosovë dhe tranzicioni në energji më të pastër në të ardhmen. Objektiv tjetër i projektit është dhe ndërtimi i kapaciteteve në fushën e energjisë dhe ngritja e punësimit të grave në këtë fushë”, thuhet në njoftim.
Kujtojmë se shuma që Kosova ka përfituar nga marrëveshja me MCC-në është 236.7 milionë dollarë.
