Në Gjykatën Themelore në Prishtinë po mbahet seanca ndaj të akuzuarve për vrasjen e Liridona Ademajt. Të akuzuar për vrasjen e 30-vjeçares janë Naim Murseli, Granit Plava, Kushtrim Kokalla dhe Tomë Dedaj.
Gjyqtarja e rastit, Fatime Dërmaku ka pyetur të akuzuarit se si deklarohen për veprën penale që janë të akuzuar, ku secili nga të akuzuarit po deklarohet me radhë, transmeton Telegrafi.
I akuzuari, Naim Murseli tha se ndjehet plotësisht i pafajshëm për vrasjen e ish-gruas së tij. Ndërsa, të akuzuarit Grantit Plava dhe Kushtrim Kokalla u mbrojtën në heshtje.
Kurse, Tomë Dedaj, tha se ndjehet fajtor se ka shitur armën.
Gjatë seancës, u prezantuan edhe disa pamje të reja nga nata fatale, ku u vra 30 vjeçarja.
Të pranishëm janë edhe familjarët e Liridonës.
Prokuroria Themelore në Prishtinë të mërkurën (15 janar 2025) ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt, të cilët ngarkohen për rastin e vrasjes së Liridona Ademajt më 29 nëntor 2023.
Në aktakuzën e Prokurorisë, thuhet se Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro.
I gjithë plani për vrasjen e Liridonës, thuhet se u bë nga bashkëshorti i saj, tani i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.
Në aktakuzë thuhet se fillimisht plani i ishte shpalosur Kokallës nga Murseli, por ai kishte refuzuar të gjente një mundësi për vrasjen e Liridonës, e më pas Kokalla kishte gjetur Plavën, me të cilin e kishte njoftuar Naimin.
E vetë Naim Murseli, thuhet se siguroi armën me 20 fishekë, nga i akuzuari Tom Dodaj, nga i cili e bleu për 280 euro. Me këtë armë, u krye vrasja e tani të ndjerës./Telegrafi/
