Gjykata Themelore në Prishtinë ka caktuar masën e paraburgimit dhjetë të pandehurve për veprën penale Pjesëmarrja ose Organizimi i Grupit Kriminal të Organizuar.
“Gjykata Themelore në Prishtinë – Departamenti Special ka vendosur lidhur me kërkesën e Prokurorisë Speciale të Republikës së Kosovës për caktimin e masës së paraburgimit në çështjen penale të të pandehurve B.G, R.H, M.B, A.K, Ç.N, L.B, R.D, A.M, E.A, F.N, për shkak të veprës penale Pjesëmarrja ose Organizimi i Grupit Kriminal të Organizuar nga neni 277 paragrafi 2 lidhur me paragrafin 1, lidhur me nenin 31 të Kodit Penal të Republikës të Kosovës”, ka njoftuar Gjykata Themelore në Prishtinë.
Gjyqtari i procedurës paraprake kërkesën e Prokurorisë Speciale të Republikës së Kosovës për caktimin e masës së paraburgimit kundër të pandehurve B.G, R.H, M.B, A.K, Ç.N, L.B, R.D, A.M, E.A, F.N e ka aprovuar si të bazuar dhe të njëjtëve iu është caktuar masa e paraburgimit për secilin, në kohëzgjatje prej 1 muaji.
Tutje në njoftim bëhet e ditur se “gjyqtari i procedurës paraprake me rastin e caktimit të paraburgimit ka vlerësuar se nëse të pandehurit do të lihen në liri, të njëjtit mund të arratisen dhe prezenca e tyre gjatë procedurës paraprake do të ishte e vështirë të arrihet, po ashtu të pandehurit mund t`i shmangen ndjekjes penale dhe në këtë mënyrë mund të pengojnë zhvillimin normal të procedurës penale, të pandehurit mund edhe të pengojnë rrjedhën e procedurës penale duke ndikuar eventualisht në bashkëkryerës të veprës penale si dhe në dëshmitarë”./21Media
