Më herët Lista Serbe morri vendim që të largohen nga institucionet e Kosovës, përfshirë Qeverinë, Kuvendin, Komunat, Sistemin Juridik, Administratën.
Në lidhje me këtë, lajmi.net ka kontaktuar me njohësin e çështjeve juridike, drejtorin e IKD-së, Ehat Miftaraj.
Miftaraj, në përgjigjen e tij ka thënë se largimi i komunitetit serb nga funksionet që kanë karakter politik dallon nga largimi i të njëjtëve nga institucionet e sundimit të ligjit.
Ai ka deklaruar se nëse policët, prokurorët, gjykatësit japin dorëheqje, ata e kanë të pamundur të kthehen në këto pozita përmes vendimeve politike.
“Largimi i komunitetit serb nga funksionet që kanë karakter puro politik dallon nga largimi i të njëjtëve nga institucionet e sundimit të ligjit. Në rast se policët, prokurorët apo gjykatësit serbë japin dorëheqje nga këto pozita të njëjtit e kanë të pamundur të kthehen në këto pozita përmes vendimeve politike. Andaj, duhet të shpresojmë se veprimet e tyre në këtë fazë më shumë janë shprehje e paknaqësisë dhe lloj proteste e asesi largim apo dorëheqje nga këto pozitat që i kanë”, ka thënë njohësi i çështjeve politike.
Tutje, ai ka deklaruar edhe se, është e domosdoshme që kjo çështje të rregullohet përmes dialogut, duke pasur parasysh që në vazhdimësi është kërkuar që çdo vendim që merret lidhur me dialogun, të bëhet në mënyrë të matur.
“Në anën tjetër, në vazhdimësi është kërkuar nga partitë të pushtet që çdo vendim që mirret lidhur me dialogun Kosovë-Serbi dhe komunitetin serb do të duhej të ishin vendime të matura dhe në konsultim dhe koordinim të plotë me partnerët ndërkombëtare, në mënyrë që mos të kemi eskalim të situatës dhe të mos cenohet apo dëmtohen të arriturat e deritanishme. Andaj, në këtë fazë është e domosdoshme që kjo çështje të rregullohet përmes dialogut dhe në koordinim të plotë me partneret ndërkombëtarë”, ka përfunduar Miftaraj.
Përndryshe, Lista Serbe, morri këtë vendim suspendimit të drejtorit të Policisë së Kosovës për rajonin e veriut, Nenad Gjuriq, i cili refuzoi që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.
