Kryeministri i Kosovës, Albin Kurti, ka theksuar rëndësinë e regjistrimit të popullsisë, ekonomive familjare dhe banesave 2024 (ReKos 2024), duke e konsideruar si më shumë sesa thjesht mbledhje statistikash.
“Është pasqyrim i realitetit tonë – ku jemi, sa jemi, si jemi dhe si të ecim përpara. Na mundëson të kuptojmë kushtet ekonomike, sociale dhe të hartojmë strategji të qëndrueshme për zhvillimin e vendit,” ka thënë ai, në ceremoninë zyrtare të prezantimit të rezultateve të para përfundimtare të ReKos 2024.
Kurti ka potencuar se ky proces, i realizuar plotësisht në formën digjitale, është një tregues i progresit të Kosovës dhe angazhimit kolektiv të qytetarëve.
“Janë shumë se numra; janë përtej të dhënave. Janë një pasqyrë e realitetit tonë, por edhe një busull drejt së ardhmes, bazuar në evidencë dhe fakte”, ka theksuar Kurti.
Kurti ka deklaruar se të dhënat e regjistrimit 2024 do të mundësojnë krijimin e strategjive të qëndrueshme për zhvillimin ekonomik dhe social, duke garantuar investime efikase me përfitime afatgjata.
“Me këto të dhëna, mund të formulojmë strategji të qëndrueshme për zhvillim ekonomik dhe social, duke siguruar që investimet tona të jenë efikase dhe të sjellin dobi afatgjata”, është shprehur tutje Kurti.
Kurti ka theksuar gjithashtu rëndësinë e parashikimeve të sakta mbi rritjen e popullsisë, migracionin dhe sfidat demografike.
“Regjistrimi na jep mjetet për të bërë parashikime shumë të sakta mbi rritjen e popullsisë, migracionin dhe sfidat që lidhen me ndryshimet demografike. Këto parashikime janë të domosdoshme, për të ndërmarrë masa paraprake dhe për ti minimizuar rreziqet”, ka deklaruar kryeministri Kurti.
