Kryeministri Albin Kurti është takuar me ministrin e Jashtëm të Malit të Zi, Ranko Krivokapiq, në kuadër të një simpoziumi në Greqi.
Përveç raporteve mes dy vendeve, Kurti tha se me ta ka folur edhe për rrezikun e sigurisë dhe paqes nga Rusia, raporton Gazeta Express.
“Në Symi Symposium u takova me Ministrin e Jashtëm të Malit të Zi Ranko Krivokapiq. Ne nënvizuam marrëdhëniet tona dypalëshe, të bazuara në fqinjësinë e mirë dhe vlerësimin e ndërsjellë dhe folëm për ndikimin e Rusisë në Ballkanin Perëndimor dhe rrezikun që ajo paraqet për paqen dhe sigurinë”, ka shkruar Kurti në Twitter.
At the @SymiSymposium I met w/Montenegro Foreign Minister Ranko Krivokapić @RankoMNE. We highlighted our bilateral relations, based on good neighborliness and mutual appreciation, and spoke of Russia's influence in the WB and the danger it poses to peace & security. pic.twitter.com/qfKRDd3Dam
— Albin Kurti (@albinkurti) July 11, 2022
Kurti dje ka takuar edhe Përfaqësuesin Special të Bashkimit Europian për dialogun Kosovë-Serbi, Miroslav Lajçak, të cilit i ka garantuar se Kosova është përherë e gatshme për dialog.
“Kryeministri Kurti theksoi sërish që Qeveria e Republikës së Kosovës është përherë e gatshme për dialog parimor, të balancuar e konstruktiv. Ai ritheksoi se nga ky dialog duhet të përfitojnë qytetarët e të dyja vendeve, nëpërmjet një marrëveshjeje të qëndrueshme e të zbatueshme, që në qendër ka njohjen reciproke. Për këtë, kemi edhe Rezolutën e Parlamentit Evropian, të miratuar pak ditë më parë, ku bëhet thirrje që Kosova dhe Serbia të arrijnë marrëveshje bazuar në njohje reciproke”, thuhej në njoftimin e Kryeministrisë.
