Në Kosovë, një numër i madh i qytetarëve ka nisur një iniciativë për bojkotimin e marketeve si pasojë e çmimeve të larta që kanë goditur buxhetet e familjeve.
Bojkotimi ndaj marketeve është planifikuar të ndodhë me datën 10 shkurt dhe të zgjasë tërë ditën.
Ky bojkot është reagim ndaj rritjes së shpejtë dhe të paarsyeshme të çmimeve të produkteve ushqimore dhe atyre bazike, të cilat janë bërë të papërballueshme për shumë kosovarë, transmeton Telegrafi.
“KOSOVA BOJKOTON“, është grupi që ka mbledhur rreth tre mijë qytetarë deri tani.
Në grupin i cili është i hapur, janë shpërndarë edhe fotografi të shumta të çmimeve të larta të produkteve ushqimore, e po ashtu nuk mungojnë edhe krahasimet e çmimeve ku në Kosovë janë më shtrenjtë se sa në vendet evropiane.
Administratorët e grupit, kanë deklaruar se qëllimi i tyre është të ndërgjegjësojnë konsumatorët për çmimet në treg.
“Qëllimi i grupit tonë është të ndërgjegjësojë konsumatorët për çmimet në treg dhe të nxisë një debat të hapur mbi këtë çështje, duke e sjellë atë në vëmendjen e publikut dhe institucioneve përkatëse. Besojmë se transparenca dhe informimi janë thelbësore për të mbrojtur interesat e konsumatorëve dhe për të ndikuar pozitivisht në politikat tregtare.
Nuk kemi asnjë synim të dëmtojmë ekonominë e marketeve, pasi ato janë pjesë e rëndësishme e ekonomisë sonë, paguajnë taksa dhe punësojnë mijëra qytetarë. Prandaj, aktivitetet e grupit tonë synojnë ndërgjegjësimin dhe jo dëmtimin e bizneseve apo krijimin e pengesave për operimin e tyre”, thuhet mes tjerash në postimin e njërit nga administratorët.
Tutje, theksohet se ata duan bojkot njëditor.
“Përmes një bojkoti njëditor, duam të sjellim këtë temë në qendër të vëmendjes dhe të krijojmë një valë reagimesh që mund të kontribuojnë në përmirësimin e situatës. Ky bojkot është një formë simbolike proteste, që ka për qëllim të theksojë shqetësimet e konsumatorëve dhe të nxisë një diskutim më të gjerë mbi çmimet e larta dhe faktorët që i ndikojnë ato”, vijon postimi.
Deri tani, ka pasur shumë qytetarë që janë ankuar për çmimet e larta.
Iniciativa për bojkotim të marketeve ka pasur edhe në Maqedoninë e Veriut, Bosnjë e Hercegovinë, Kroaci e të tjera shtete./Telegrafi/
