Kreu i BSPK-së, Atdhe Hykolli, ka bërë me dije se të hënën dalin pagat për zyrtarët publik.
“Sot kam pasur kontakte me parterin tonë social, sipas tyre ka ndodhur një gabim teknik. Unë besoj se të hënën dalin pagat”, tha ai në konferencë për media.
Bashkimi i Sindikatave të Pavarura të Kosovës ka njoftuar se kanë pezulluar grevën e filluar më 25 gusht në administratën publike dhe arsim, shkruan Reporteri.net.
Ata kanë thënë se greva do të jetë e pezulluar deri në janar të vitit 2023 dhe mësimi do të fillojë të hënën.
Ndërkaq, kryetari i Bashkimit të Sindikatave të Pavarura të Kosovës (BSPK), Atdhe Hykolli, ka thënë se greva ka qenë e ligjshme dhe u përdor si mjet i fundit i presionit.
“Greva ishte detyrim sindikal dhe u përdor si mjet i fundit presioni në raport me partnerin social me Qeverinë. Nuk ishte akt personal, e as individual por mjet i organizimit sindikal”, është thënë në konferencë.
Kreu i SBASHK, Rrahmaj Jasharaj ka thënë se greva nuk po mbyllet, por po pezullohet deri në janar të vitit 2023.
“Urojmë që kjo kohë të shfrytëzohet nga qeveria për reflektim dhe dialog të mirëfilltë, sepse janari vjen shpejt dhe nuk është mirë që të ndodh prapë greva si kjo e tanishmja”, tha Jasharaj në një konferencë për media. /Reporteri.net
