Bashkësia Islame e Kosovës ka lëshuar një vërejtje për të gjithë imamët dhe punonjësit e BIK-ut lidhur me qëndrimet e tyre politike në periudhën e fushatës elektorale të zgjedhjeve parlamentare të këtij viti, që do të mbahen me 9 shkurt.
Në lëndën e parashtruar si vërejtje, BIK-u u ka tërhequr vërejtjen nëpunësve administrativë dhe fetarë që të shtojnë kujdesin karshi paraqitjeve mediale, si dhe qëndrimeve në rrjete sociale.
BIK ndalon qëndrimin personal politik, pjesëmarrjen në fushatë zgjedhore, të qenit aktivist i ndonjë partie politike apo edhe kandidat për deputet.
“Çdo veprim i tillë nga sa u përmend më lart, konsiderohet shkelje e Kushtetutës së BIK-ut, ligjeve dhe akteve tjera normative të saj, për çfarë edhe do sanksionohen”, thuhet ndër të tjera në vendim.
Kujtojmë se përgjatë ditës së djeshme, tre zyrtarë policorë janë suspenduar si pasojë e pjesëmarrjeve nëpër tubime politike./Lajmi.net/
