Dyshja kosovare Erion Bajrami/Ermal Maliqi është përshëndetur nga kualifikueset e Kampionatit Evropian të volejbollit në rërë për grupmoshën nën 22-vjeç, që po mbahet në Vilsingen të Holandës, pas disa paraqitjeve të forta gjatë ditës, duke regjistruar një bilanc prej dy fitoreve dhe dy humbjeve.
Në përballjen e parë kualifikuese, dyshja e drejtuar nga trajneri Fatlum Hajrizi tregoi dhëmbët duke mposhtur me përmbysje dyshen armene Asmarya, K/Nazaryan, me rezultat 2-1 (14-21, 21-13, 15-10) në sete.
Ishte një paraqitje fantastike nga “Dardanët” e rinj, të cilët në përballjen e dytë të ditës, në kuadër të këtyre kualifikimeve u mposhtën nga Greqia me rezultat 0-2 (9-21, 18-21) në sete, derisa kishin edhe një shans kualifikimi në vazhdim.
Në takimin e radhës, çifti Bajrami/Maliqi tregoi karakter të vërtetë fituesi, duke u këndellur nga humbja paraprake për të mundur dyshen skoceze Allan/Orr me rezultat 0-2 (6-21, 9-21) në sete, duke siguruar një përballje kundër Estonisë (Kais/Meius) në proces.
Kosovarët tentuan të bënin më shumë në këtë takim, por eventualisht pësuan humbje me rezultat 2-0 (21-13, 21-11) në sete, për t’u përshëndetur në mënyrë të dinjitetshme nga gara.
