Në Klinikën e Kardiokirurgjisë në QKUK është kryer një operacion i rëndë te një pacient i moshës rreth 31-vjeçare.
Kardiokirurgu Ramë Alaj, i cili e ka kryer këtë intervenim, ka thënë se pacienti kishte çarje të arotës, enës kryesore të gjakut – rreth 9 cm, më e madhja deri tani e regjistruar në këtë klinikë.
“Gjatë kësaj jave në klinikën e kardiokirurgjisë kam operuar një pacient në moshë shumë të re (viti: 1991) me dg. Acute Aortic Dissection et Aortic Valve Regurgitation (ҫarje e arotës rreth 9 cm), më e madhja e regjistruar deri më tani në klinikën tone” ka shkruar Alaj në Facebook.
Sipas tij, ky operacion është realizuar me sukses falë punës ekipore.
Postimi i tij i plot:
Vetëdijësim!
Gjatë kësaj jave në klinikën e kardiokirurgjisë kam operuar një pacient në moshë shumë të re (viti: 1991) me dg. Acute Aortic Dissection et Aortic Valve Regurgitation (ҫarje e aortës rreth 9 cm), më e madhja e regjistruar deri më tani në klinikën tonë. Kjo falë punës ekipore intraoperative dhe postoperative me: Dr. Shpejtim Shurdhiqi, Dr. Leonard Bytyqi, Dr. Ngadhnjim Arifi, Dr. Erblin Beqiraj, anestesion: Dr. Dafina Matoshi, Dr. Doruntina Bunjaku, perfusion: Genc Tasholli, Shyqyri Hoxha, ins. Edonesa.
Po e bëjë këtë postim jo për të treguar punën tonë rutinë, po për shkak të vetëdijësimit të pacientëve dhe kolegëve tanë, që mos ta anashkalojmë një sëmundje të tillë vrastare me një vdekshmëri 1-2% në orë dhe 50% në 48 orë e që haset në 3.5 raste në 100.000 banor.
Ju lutem,
Mos e nënҫmoni dhimbjen e gjoksit.
