I dërguari special i BE-së për Ballkanin Perëndimor Miroslav Lajçak, tha se vendet e Ballkanit Perëndimor kanë ende çështje të pazgjidhura që vazhdojnë t’i pengojnë në rrugën drejt BE-së.
Lajçak thotë se pas agresionit rus në Ukrainë, vendet e Ballkanit Perëndimor duhet ta marrin seriozisht zgjerimin. Emisari evropian thotë se kjo nuk mund të arrihet në mënyrë të njëanshme, nëse njëra palë e merr seriozisht këtë rrugë, kurse tjetra jo.
“Vendet e Ballkanit Perëndimor, ndryshe nga vendet e Evropës Qendrore, kanë ende çështje të pazgjidhura nga e kaluara që vazhdojnë t’i pushtojnë. Për vendin tim (Sllovakinë), dhe pjesën tjetër të Evropës Qendrore, integrimi në BE ishte një prioritet absolut, kështu që ne ishim plotësisht të përkushtuar për ta arritur atë”, tha Lajçak.
“Nuk dua të flas për fajin e dikujt, por ka pasur faktorë si në BE ashtu edhe në atë ballkanik që na çojnë në një situatë ku flasim për të ardhmen e BE-së, por pa progres”, ka thënë Lajçak.
“Por tani, pas agresionit të Rusisë kundër Ukrainës, ne shohim se BE dhe Ballkani duhet ta marrin seriozisht zgjerimin. Kjo nuk mund të arrihet nëse njëra palë e merr seriozisht dhe tjetra jo”, ka thënë Lajçak në një intervistë për agjencinë e lajmeveHina.
Lajçak, megjithatë, thotë se është “mosmirënjohje të flasësh” për datat e zgjerimit të ardhshëm të BE-së.
“Por ajo që do të doja të shihja është që partnerët tanë në Ballkanin Perëndimor të fillojnë të marrin pjesë më shumë në programet e partneritetit të BE-së. Për të qenë në të njëjtën dhomë. Jo vetëm kur diskutojmë për Ballkanin Perëndimor, por edhe që ata të jenë pjesë e diskutimit për tema të tjera, për të parë se jemi seriozë për to”, thotë ai.
