Vetëm në 11-ditëshin e parë të muajit prill është importuar rreth 5.4 milionë euro energji elektrike, ka njoftuar KESCO të premten.
Rënia e temperaturave dhe pamjaftushmëria e mbulimit të konsumit nga prodhimi vendor, ka ndikuar që të importohet energji elektrike në vlerë kaq të madhe në këtë kohë.
“Brenda këtyre datave prodhimi vendor nuk ka mbuluar të gjithë nevojën për konsum, ndërsa piku më i lartë i regjistruar në këtë periudhë ka arritur deri në 1100 MW\h. Rrjedhimisht, importi ka qenë I domosdoshëm për të mbuluar këtë diferencë në mes konsumit dhe prodhimit”, thuhet në njoftimin e KESCO-s.
Në njoftimin e KESCO thuhet se konsumi mesatar ditor ka arritur deri në 19,500 MWh, ose 810 megavat në orë, kurse çmimi në berza ndërkombëtare është mbi 130 euro për megavat/orë.
“Në këto rrethana ajo se çfarë është e rëndësishme për të gjithë sistemin, është vazhdimi i kursimit të energjisë. Pra, të gjitha këshillat e ndara se si të kursehet energjia elektrike duhet të jenë pjesë e përditshmërisë sonë, sidomos në periudha të tilla kur pasojat e krizës energjetike globale kanë prekur rëndë të gjithë sistemin elektroenergjetik. Pavarësisht të gjitha pengesave të cilat dalin rrugës, ne gjithmonë do të bëjmë më të mirën tonë për të pasur furnizim stabil dhe të qëndrueshëm për konsumatorët tanë”, thuhet në njoftimin e KESCO./
