Ballina Sport Klubi Futbollisitik “Ferizaj” me investitorë anglezë

Klubi Futbollisitik “Ferizaj” me investitorë anglezë

Më në fund, është privatizuar edhe klubi i Superligës së Kosovës, KF Ferizaj.

Pas problemeve të shumta viteve të fundit, Ferizaj është bërë me kryesi stabile dhe problemet financiare sipas tyre do të marrin fund.

Në krye të Ferizajt kanë ardhur investitorë anglez dhe biznesmenë vendor.

Deputeti Ilmi Reçica tha se kjo ngjarje është historike për të dhe për të gjithë Ferizajn dhe premtoi se kushdo që të jetë në Bord të klubit do ta ketë ndihmën e madhe të tij dhe do të jenë së bashku drejt qëllimeve të klubit.

Reçica: Kjo është një ditë historike për klubin e futbollit Ferizaj

“Në rrethana shumë të rënda, në rrethana kur na ka munguar shumëçka, jo vetëm mundësia për të luajtur futboll, por na ka munguar liria, lëvizja e lirë, na ka munguar liria e të shprehurit, dhe ju e keni mbajtur gjallë këtë sport dhe dua t’iu falënderoj secilin veç e veç, ju që jeni këtu dhe ju që përfaqësoni ata që janë shumë më të shumtë në këtë sallë. Dua të them se na keni motivuar që gjatë rrugëtimit tonë të gjejmë kondicion jo vetëm fizik por edhe mendor edhe atdhetar, për t’i lëvizur proceset përpara. Nuk do të ishte ky grup ashtu siç është pa simpatizantët, pa ‘Ujqit’ tanë, të cilët në rrethana kur nuk kemi qëndruar aq mirë, në rrethana që me të vërtetë kemi qenë para situatave që të zmbrapsemi ata na kanë dhënë zemër edhe lojtarëve edhe të gjithë neve”, tha Reçica.

Ndërkaq edhe kryetari i komunës të Ferizajit Agim Aliu tha se që nga sot fillon një epokë e re për klubin e futbollit të kësaj komune, por jo vetëm për këtë klub por edhe për futbollin kosovar në përgjithësi.

Aliu: Po punojmë për futbollin e Ferizajt

“Sigurisht që ky përkushtim, ky investim i ardhjes së legjendës së futbollit, Brian Dean me miqtë tanë edhe të tij, tregon më së miri se ata kanë besim në Kosovën, ata kanë besim tek futbollistët tonë, ata kanë besim edhe në çështjet e investimeve strategjike në Republikën e Kosovës. Por më lejoni si kryetar i Komunës në këtë ditë të veçantë për Ferizajn dhe në këtë ditë historike për klubin e futbollit të Ferizaj të shprehi të gjithë ato falënderime për të gjithë ato gjenerata që derdhen djersën dhe mundin për klubin e Ferizajt… Sot po e hapim një perspektivë të re, po mendojmë, po veprojmë dhe po punojmë për të krijuar të ardhme të futbolldashësve, të nxënësve, të të rinjve tanë në Ferizaj dhe në të gjithë Republikën e Kosovë. Projekti që është i përbashkët mes bashkëinvestitorëve anglezë dhe ferizajas është një projekt i së ardhmes jo vetëm për Ferizajin por është një projekt i së ardhmes edhe për vet Republikën e Kosovës”, tha Aliu.

Legjenda e futbollit anglez, Brian Dean i cili do të zotërojë edhe 50 përqind të aksioneve të klubit , u shpreh tejet i lumtur me faktin se është në gjendje t’i ndihmojë në radhë të parë futbollit të Kosovës e më pas edhe futbollistëve të cilët do të jenë pjesë e klubit të Ferizajit.

Dean: Do të punojmë për ta dërguar Ferizajn në Evropë

“Së pari dua t’iu falënderoj se çdoherë që vij në Kosovë jam i mirëpritur. Ju e dini që jeta ime është futbolli. Kam qenë i përfshirë në ndeshje profesionale për rreth 13 vjet. Është pasioni im. Arsyeja se pse jam këtu është të punoj fort me investitorët, me u siguru që klubi i futbollit Ferizaj ka një etikë të fuqishme profesionale, kjo do të thotë unë di rreth menaxhimit të lojtarëve. Është e rëndësishme sepse komuniteti është i lumtur me ne. Kudo që kam qenë kjo është gjëja e vetme që kam kërkuar, energjia pozitive e komunitetit. Sot jam këtu të sigurohem se Ferizaj ka një infrastrukturë të mirë, të cilën e meritojnë të rinjtë dhe skuadra e parë. Tjetër arsye se pse jam këtu është edhe kjo, sa herë që rikthehem në shtëpi, iu tregoj njerëzve se sa e mirë është Kosova për t’u vizituar dhe çdo herë që ritakohem me shokë, dëshirojnë që të vijnë prapë këtu”, tha ndër t jerash ai.

Ky privatizim pritet t’u hapë rrugë shumë futbollistëve, e sidomos atyre që janë pjesë e klubit të Ferizajt.

Te ekipi menjëherë ka nisur puna dhe klubi ka filluar kontaktet me disa yje të Superligës së Kosovës